Тошкент ислом институтининг “Таҳфизул Қуръон” кафедраси устозлари Қуръони карим ва унга тааллуқли бўлган махсус илмларни талабаларга ҳамда юртимиз ёшларига таълим бериб келмоқда. Жумладан, ушбу кафедрада Қуръон қироати ва тажвид, Тафсир, Улумул Қуръон фанлари мутахассислик даражасида таҳсил берилади.
Юртимизда бўлаётган кенг кўламли ислоҳотлар самараси ўлароқ Ўзбекистон мусулмонлари идораси ва Тошкент ислом институти ташаббуси билан жорий йил август ойида “Таҳфизул Қуръон” кафедрасининг малакали устозларидан иборат жамоа Миср Араб Республикасининг Искандария шаҳридаги “Ал-Азҳар” университетига ташриф буюрдилар. У ерда Азҳари шариф тасарруфидаги “Маъҳадул қироат”, яъни Қироатлар институтининг Қуръон қироатлари ва тажвид илми шайхларидан таълим олиб, малака оширдилар.
Давлат раҳбари Ш.Мирзиёев жорий йилнинг июн ойида Сурхондарёдаги учрашувда «Тошкент ислом институтида 2024 йилдан магистратура, 2025 йилдан докторантура йўналишида кадрлар тайёрлаш йўлга қўйилади» деб таъкидлаган эди.
Шунингдек, ушбу илмий сафар Тошкент ислом институтида очилажак магистратура босқичида ўқитилиши кўзда тутилган фанлар бўйича ҳам амалга оширилди.
“Маъҳадул қироат” институтининг 10 қироат, Усули тафсир, Тафсир, Улумул Қуръон илмларида мутахассис бўлмиш уч нафар олимидан Таҳфизул Қуръон кафедраси ўқитувчилари ТИИ магистратура босқичида ўқитилиши режалаштирилган фанлардан малака оширдилар:
- Шайх Саййид Хаттоб Абдулҳамид Мағробий – суғро ва кубро 10 мутавотир қироат ва 4 шозз қироат мутахассиси;
- Амр Иброҳим Муҳаммад Увайдо – суғро ва кубро 10 мутавотир қироат, ҳанафий мазҳаби фиқҳи, араб тили грамматикаси мутахассиси;
- Абдурраҳмон Рафъат Муҳаммад Ғунайм – суғро ва кубро 10 мутавотир қироат, усулул-фиқҳ, тафсир илмлари мутахассиси.
Сафар охирида “Ал-Азҳар” ва “Маъҳадул қироат” шайхлари томонидан кафедра устозларига қироатлар ва илмий асарларнинг ижоза шаҳодатномалари ҳамда малака оширгани тўғрисида фахрий ёрлиқлар топширилди.
Тошкент ислом институти ректори, сиёсий фанлар доктори, профессор Муҳаммадолим домла Муҳаммадсидиқов Мисрда бўлиб қайтган Жаҳонгир қори Неъматов бошчилигидаги Таҳфизул Қуръон кафедрасининг 10га яқин қори устозларини қабул қилиб, илмий сафарда эришилган натижалар, олдинга қўйилган мақсад-вазифаларнинг ижроси, магистратура босқичида ўтиладиган Қуръонга оид фанлар ва улардан олинган ижозалар билан танишиб, келгусидаги режалар муҳокама қилинди.
Мазкур қисқа муддатли илмий сафар орқали “Таҳфизул Қуръон” кафедраси устозларига яқин ўтмишда узилган илмий силсилаларни қайта тиклаш ва муборак олтин силсилаларни ватанимизга қайтариш имконияти берилди. Аллоҳнинг изни билан бу илмлар юртимизда тарқалади ва Қуръон нури хонадонларимиз узра янада кўпроқ таралади.
Жаҳонгир Рўзиев,
ТИИ «Таҳфизул Қуръон» кафедраси ўқитувчиси,
«Қуръони карим ва тажвид» ўқув курслари бўлими бошлиғи
