Жорий йилнинг 3 апрель куни Имом Бухорий номидаги Тошкент ислом институти профессор-ўқитувчилари ва ходимларининг илмий тадқиқот ишларини ривожлантириш мақсадида навбатдаги илмий семинар ташкил этилди. Семинарда Алишер Навоий номидаги Тошкент давлат ўзбек тили ва адабиёти университети “Ўзбек адабиёти тарихи ва матншунослик” кафедраси мудири, филология фанлари доктори, профессор Нурбой Жабборов  “Илмий тадқиқот методологияси” мавзусидаги маърузаси билан иштирок этди. Профессор Н.Жабборов диссертация ишини ёзиш жараёнида эътибор қилиниши талаб этиладиган муҳим жиҳатларга урғу қаратди. Хусусан, илмий иш қилмоқчи бўлган тадқиқотчида танланган тадқиқот соҳаси бўйича иқтидор, салоҳият ва кўникма бўлиши лозим. Шунингдек, амалга оширилиши режалаштирилган тадқиқот ишининг бугунги кунда жамият ривожи ва илм фан тараққиётига хизмат қилиши ва  чуқур ўйланган мавзуга асосланиши керак эканини алоҳида таъкидлади. Бундан ташқари, диссертация мавзусини шакллантириш жараёнида турли тиллардаги атамалардан  фойдаланилган тақдирда мазкур атамаларнинг танланган мавзуга, ўзбек тилининг ўзига хослигига, миллий қадрият ва тамойилларга тўла мос келишига алоҳида эътибор берилиши лозимлигига урғу берди. Шунингдек, диссертация иши баён услубигагина асосланиб қолмай, балки таснифий, мунозаравий, таҳлилий услубларга асосланиши кераклиги, диссертация иши тугалланганида мавзунинг объекти, предмети, назарий, амалий, илмий янгиликлари ва амалиётга жорий қилиниши мумкин бўлган амалий натижаларни ўзида акс эттириши лозим эканини ҳам қайд этиб ўтди. Маърузачи семинар сўнгида профессор-ўқитувчиларнинг мавзу юзасидан саволларига жавоб берди  ва ўзининг бу борадаги муҳим тавсияларини берди. Семинар сўнгида Тошкент ислом институти илмий ишлар ва фан бўйича проректори С.Примов маърузачига интитут раҳбарияти номидан ташаккурнома топширди. ТИИ Матбуот хизмати 665

Тошкент ислом институтининг 3-курс талабаси Турғунбоева Рухсора 30 пора Қуръони каримни бир кунда, 11 соат ичида ёддан ўқиб берди. Қуръони каримни ўқиш жараёнини “Қуръон илмлари” кафедраси ўқитувчилари Жаҳонгир қори Неъматов, Аҳмадхон қори Рашидов, Валихон қори Азимбоев, Абдулбосит қори Қобилов, Робия Нажмиддинова ва бошқа устоз ҳамда талабалар кузатиб бордилар. Ушбу натижани тақдирлаш учун 3-апрель куни тадбир ташкил қилинди. Тадбирда ТИИ Илмий ишлар ва фан бўйича проректор, доцент Соатмурод домла Примов, ТИИ Ўқув ишлари бўйича проректор Жаҳонгир домла Рўзиев, Қуръон илмлари кафедраси мудири Жаҳонгир домла Неъматовлар иштирок этишди. Соатмурод домла Примов мазкур натижани эътироф этиб, устозларга ғайрат ва шижоат тилади. Шунингдек Турғунбоева Рухсоранинг Тошкент ислом институтида ўтказилган “Қуръони мусобақаси – 2025” танловида ғолиб бўлганини эътироф этиб, яқин кунларда Иорданияда бўлиб ўтадиган Халқаро Қуръон мусобақасидаги иштирокида муваффақиятлар тилади. Қуръони каримни 11 соатда ёддан ўқиб, хатм қилган Рухсора Турғунбоева ноутбук ва эсдалик совғалари билан тақдирланди. Сўнгги ойда Қуръонни бир ўтиришда ёддан ўқиб берган талабалар – Музаффархонова Робия ва Турғунбоева Рухсоранинг ота-оналарига ТИИ ректори ташаккурномаси топширилди. Эслатма: Тошкент ислом институтида Қуръонни бир кунда хатм қилиш анъанаси… “Қуръон илмлари” кафедраси устозларининг меҳнати натижасида Тошкент ислом институтида Қуръони каримни бир кунда тўлиқ ёддан ўқиб бериш анъанага айланди. Бугунги кунга қадар бундай ютуққа эришган қориялар сони 13 нафарга етди. Шу вақтгача ушбу натижани қуйидаги қориялар қайд этган: Гулруҳ Кенжабек қизи; Робия Нажмиддинова; Фотима Абдуллаева; Ҳавасхон Акбарова; Сайдиллаева Назокат; Мираҳмадова Ҳуснора; Муҳамматханова Мухлиса; Қурбонова Хадича; Орифжонова Муҳсина; Амина Хўжаёр; Руқайя Юсуфий; Музаффархонова Робияхон. Тарихий маълумот: 2014 йилда Тошкент ислом институти тарихида илк бор Ихтиёр қори Абдураҳманов Қуръони каримни бир кунда, бир ўтиришда тўлиқ ёддан ўқиб берган. Робия Нажмиддинова, ТИИ Қуръон илмлари кафедраси ўқитувчиси  844

Ташриф давомида марказ директорининг илмий-тадқиқот ишлари бўйича ўринбосари доцент, Тарих фанлари бўйича фалсафа фанлари доктори (PhD) Иргаш Даминов Иноятович иштирокида “Абул Муъин Насафий илмий меросининг бугунги кундаги аҳамияти” мавзусида давра суҳбати бўлиб ўтди. Мазкур суҳбатда маърузачи имом Мотуридий, имом Насафий ва имом Таҳовий каби уламоларнинг асарлари, уларнинг ақидавий қарашлари ва бугунги кунда мотуридийлик таълимотининг долзарблиги юзасидан муҳим маълумотлар берилди. Қолаверса, бугунги кунда уларнинг асарлари устида ишлаш, матн ва шарҳларини таржима қилиш ва бу борадаги юртимизда мавжуд бўлган қўлёзмаларни тўплаш ва ўрганиш борасидаги олиб борилаётган ишлар ҳақида ҳам тўхталиб ўтилди. Давра суҳбати сўнгида талабалар мавзу юзасидан ўзларини қизиқтирган саволларга жавоб олдилар. Мазкур ташриф талабаларнинг аждодларимиз бой илмий-маънавий меросига бўлган қизиқишини ошириш, уларнинг билим ва тадқиқотчилик салоҳиятини янада юксалтиришга хизмат қилади. ТИИ Матбуот хизмати 576

Жорий йилнинг март ойи “Эътиқод мусаффолиги ойлиги” муносабати билан Имом Бухорий номидаги Тошкент ислом институтида қатор маънавий-маърифий тадбирлар ўтказилмоқда. Шундай тадбирлардан бири сифатида “Ақоид ва фиқҳий фанлар” кафедраси даценти, тарих фанлари доктори Сайқал Ахмедов 4-курс талабалари учун “Мотуридия ва Ашъария таълимотлари ўртасидаги фарқлар” мавзусида очиқ дарс ўтказди. Мазкур очиқ дарсда кафедра мудири Ф.Жўраев ва кафедра ўқитувчилари А.Абдубаннаев, М.Баймиров, А.Ғофуров, Н.Рахимов ва бошқа устозлар иштирок этишди.     Очиқ дарс давомида талабаларга мотуридия ва ашъария таълимотлари ўртасидаги фарқлар, уларнинг далиллари ва мулоҳазалари батафсил тушунтирилди. Дарс мобайнида қуйидаги мавзулар ҳам очиб берилди: Ақидавий ихтилофлар борасидаги эътиқод; Мотуридия ва ашъария таълимотлари ўртасидаги фарқлар борасида ёзилган асарлар; Ушбу очиқ дарс талабаларнинг ақийдавий билимларини мустаҳкамлаш, ислом таълимотларидаги турли қарашларни чуқур ўрганиш ва таҳлил қилиш кўникмаларини ривожлантиришга хизмат қилди. 550

Эслатиб ўтамиз, 2024-2025 ўқув йили давомида 6 нафар талаба қизлардан иборат 4 та жамоа бир неча босқичларда беллашиб келаётган эди. Ўтказилган ҳар бир беллашув алоҳида кайфият ва натижаларга бой бўлди. Ҳар бир босқич талаба қизларнинг янада шижоатланишига сабаб бўлди. Бугунги умумхалқ “Наврўз” байрамига бағишлаб ўтказилган финал беллашуви ҳам ўзгача руҳда ўтди. Талаба қизлар финал босқичда янада жидду-жаҳд билан беллашдилар ҳамда қуйидаги натижа қайд этилди: 1-ўрин: “Пешқадамлар” гуруҳи; 2-ўрин: “Улун нуҳа” гуруҳи; 3-ўрин: “Фотима Самарқандия” гуруҳи; 4-ўрин: “Сабиқот” гуруҳи. “Заковат” интеллектуал ўйинининг ўтказилиши анъана тусига кириши талаба қизларда интеллектуал салоҳиятни ошириш ва чархлашга сабаб бўлишига умид қилган ҳолда ушбу анъанани давом эттириш ниятида илк мавсумга якун ясалди. ТИИ Матбуот хизмати 664