Ҳар йили юртимизда 1 октябрь – Ўқитувчи ва мураббийлар куни муносабати билан турли байрам тадбирлари ўтказиш анана тусига кирган. Ушбу касб байрамни муносиб ўтказиш мақсадида Ўзбекистон мусулмонлари идораси тизимидаги барча таълим муассасаларида ҳам турли маънавий-маърифий тадбирлар ўтказилмоқда. Жорий йилнинг 30 октябрь куни Имом Бухорий номидаги Тошкент ислом институтида ҳам “1 октябрь – Ўқитувчи ва мураббийлар куни” муносабати билан “Устозлар сизга таъзим” шиори остида байрам тадбири бўлиб ўтди. Тадбирда ТИИда бир неча йиллар давомида ректорлик лавозимида фаолият юритган Абдуқаҳҳор Шоший, Абдуқаюм домла Азимов, Ўмида фатво бўлими мудири сифатида ишлаган Абдулҳамид домла Турсунов, Ўзбекистон Вақф хайрия жамоат фонди раиси И.Халилов, ЎМИ ташқи алоқалар бўлими мудири Акмалхон домла Шокиров, фахрий устозлардан Аҳмаджон домла Бобомуродзода, ҳамда институтмизнинг ўқитувчи-мураббийлари ва талабалари иштирок этди. Тадбир аввалида муборак Қуръони карим оятларидан тиловат қилинди. Сўнг тадбирни Тошкент ислом институти ректори У.Ғафуров кириш сўзи билан очиб, ўқитувчилик касби нақадар шарафли эканлиги, унинг машаққатлари ҳақида, юртимизда устоз ва мураббийларнинг қадрини ошириш йўлида олиб борилаётган ислоҳотлар ҳақида гапириб ўтди. Сўнг ЎМИ раиси муфтий Усмонхон Алимов ҳазратларининг ўқитувчиларга йўллаган табриги ўқиб эшиттирилди. 1 курс талабалари томонидан тайёрлаб келинган саҳнавий кўриниш йиғилганларга ўқитувчилик шарафли ва ўта масъулиятли вазифа эканлигини ёдга солди. Модул таълим тизими 1 курс талабалари сўзга чиқиб устоз ва мураббийларни келаётган касб байрами билан табриклаб, ўзининг дил изҳорларини билдириб ўтди. Шундан сўнг Президантимиз ташаббуси билан ташкил қилинган Вақф хайрия жамоат фонди ҳомийлигида институтнинг собиқ ректорлари: Абдуқаҳҳор Шоший домла, Баҳодир домла Муртазоев, Абдуқаюм домла Азимов; фахрий устозлар: Аҳмаджон домла Бобомуродзода, Абдулҳамид домла Турсунов, Муҳаммад Акмалхон домла Шокиров, Салоҳиддин домла Шерхонов; институтда узоқ йиллар мобайнида хизмат қилган устозлар: А.Хомидов, А.Абдуллаев, И.Аҳроров, М.Сайдалиев, С.Рустамов, С.Масаитов ҳамда ТИИда 2018-2019 ўқув йили давомида фидокорона меҳнати, диний-маърифий ишлар самарадорлигини оширишга қўшган муносиб ҳиссаси, жамоат тадбирларида фаол иштироки, ёш авлоднинг онгу шуурида Ватанга муҳаббат ва садоқат туйғусини уйғотиш, уларни турли таҳдидлардан асраш, комил инсон этиб вояга етказиш йўлидаги беқиёс хизматлари учун Ф. Жураев, Ж. Неъматов, П. Каттаев, А.Олимов ва М.Мамаюсуповлар қимматбаҳо совғалар билан тақдирланди.Тадбир сўнгида йиғилган устоз ва талабаларга Абуқаҳҳор Шоший домла ҳамда Абдулҳамид домла Турсунов ўзларининг қимматли маслаҳатларини беришди. 377

2019 йилнинг 27-сентябрь куни Тошкент ислом институтининг “101”, “102” ҳамда “105” гуруҳ талабалари “Ижтимоий фанлар” кафедраси мудири О.Тангиров, кафедра ўқитувчиси А.Тошмирзаев ҳамда талабалар куратори А.Олимовлар раҳбарлигида Тошкент шаҳридаги “Ўзбекистон тасвирий санъат галереяси”га ташриф буюрдилар. Талабаларни галерея директори Жаҳонгир Темирходжаев кутиб олди ва кўргазма билан таништирди. Унинг айтишича,  Ўзбекистон тасвирий санъат галереяси 2004 йил Мустақиллик куни арафасида очилган бўлиб, ХХ аср Ўзбекистон тасвирий санъатининг барча даврлари, мактаблари, йўналишлари ва етук рассомлар ижодини ўзида акс эттирган бой тўпламга эга.  Таъкидлаш жоизки, шу кунларда галереяда “Замонлар оша маданият” номли Туркия маданиятини ўзида акс эттирган кўргазма бўлиб ўтди. Кўргазмада хаттотлик, ёғоч ўймакорлик санъатининг  ноёб намуналари ўрин олган. Талабалар музейни томоша қилишар экан, айниқса, галереянинг нумизматика тўпламидан жой олган Ўрта Осиё ҳудудида қадимдан то ҳозирги давргача муомалада бўлган тангалар намойиш этилиши уларда катта таассурот қолдирди. Эслатиб ўтамиз, экскурсия “Сентябрь – маънавият асослари” фан ойлиги доирасида ташкил этилди. “Ижтимоий фанлар” кафедраси кабинет мудири Ҳ.Нажмиддинов 914

Кекса авлод вакилларининг жамиятдаги ўрни ва ижтимоий фаоллигини янада ошириш чора-тадбирлари тўғрисидаги Ҳукумат қарори қабул қилинди. Қарорга мувофиқ, 2019 йилдан бошлаб ҳар йили октябрь ойининг биринчи ҳафтаси «Кексалар ҳафталиги» этиб белгиланди. Шунингдек, қарорга кўра: вазирлик, идора ва хўжалик бирлашмаларида раҳбар ўринбосарларидан бири жамоатчилик асосида кексалар масалалари учун масъул этиб белгиланади ва «Фахрийлар кенгаши» фаолиятини мувофиқлаштиради; – меҳнат жамоаларида пенсияга чиқиш арафасида бўлган меҳнат фахрийларини тақдирлаш ва нафақага кузатиш тадбирларини ўтказиб бориш амалиёти жорий этилади. «Ўзбекистон бўйлаб саёҳат қил!» дастури асосида кекса авлод вакилларининг республика бўйлаб тарихий шаҳар ва зиёратгоҳларга саёҳати уюштирилади. Қарор билан, шунингдек, «Кексалар маслаҳати» гуруҳлари тўғрисида намунавий низом тасдиқланди. Ушбу гуруҳларнинг асосий мақсади кексаларнинг муаммоларини манзилли ўрганиш ва бартараф этишдан иборат. Манба:   «Ҳуқуқий ахборот» канали 158

Муҳтарам устоз ва мураббийлар! Аввало, сиз, азизларни, таълим-тарбия соҳасида меҳнат қилаётган барча педагог ходимларни Ўқитувчи ва мураббийлар куни билан чин қалбимдан табриклаб, энг эзгу тилакларимни изҳор этаман. Ушбу қутлуғ айёмда барчамиз бизга илм ўргатган, ҳаёт сабоғини берган жонкуяр, фидойи ўқитувчи ва домлаларимизга чуқур ҳурмат бажо келтириб, чин дилдан таъзим қиламиз. Ҳақиқатан ҳам, ўзининг кўз нури, қалб қўри, бутун борлиғини ёш авлод тарбиясига бахш этадиган ўқитувчи ва мураббийлар меҳнати, жасорати ҳар қандай юксак баҳоларга муносибдир. Бу ҳақда фикр юритар эканмиз, улуғ маърифатпарвар бобомиз Маҳмудхўжа Беҳбудийнинг: “Авлодларингизга фақат бугуннинг эмас, келгуси замоннинг илмини ўргатинг”, деган сўзлари беихтиёр ёдимизга тушади. Чиндан ҳам, дунё миқёсида рақобат янада кучайиб борадиган, ўта мураккаб бир даврда яшайдиган болаларимизни келажакка тайёрлаб, соғлом ва баркамол инсонлар этиб вояга етказиш таълим-тарбия соҳаси, ўқитувчи меҳнатининг туб моҳиятини ташкил этади. Ана шу ўткир ҳақиқатни ҳисобга олиб, биз таълим-тарбия соҳасидаги ислоҳотларни давлат сиёсатининг энг муҳим ва устувор йўналиши даражасига кўтардик. Ўтган қисқа даврда мактабгача таълим муассасалари тармоғини кенгайтириш, мактаб таълимида 11 йиллик тизимга ўтиш, академик лицей ва касб-ҳунар коллежларини оптималлаштириш, нодавлат таълим хизмати кўрсатиш бўйича кенг кўламли ишларни амалга оширдик. Бугунги кунда сизларнинг, бутун эл-юртимизнинг қизғин қўллаб-қувватлаши билан мактаб таълимини ривожлантириш умуммиллий мақсадга, умумхалқ ҳаракатига айланиб бормоқда. Буюк алломаларимиз, атоқли шоир ва адибларимиз номи билан аталадиган ижод ва табиий фанларга ихтисослаштирилган мактаблар, “Темурбеклар мактаблари”, Президент мактаблари каби мутлақо янги намунадаги замонавий ва инновацион таълим масканлари айни шу мақсадга хизмат қилади. Бу борада умумтаълим мактаблари тизимини ривожлантириш масаласига устувор аҳамият берилмоқда. Бунинг тасдиғини сўнгги икки йилда 238 та янги мактаб барпо этилганида ҳам кўриш мумкин. Ҳолбуки, 2010-2016 йилларда бу соҳага етарли эътибор берилмагани туфайли 99 та мактаб ёпилган эди. Мазкур соҳани ривожлантириш учун ажратилаётган бюджет маблағлари ҳажми ҳам ортиб бормоқда. Жумладан, жорий йилда мактабларга 2017 йилга нисбатан 81 фоиздан зиёд маблағ ажратилди. Юртимизда боғча, мактаб ва олий таълим тизимида ишлаётган тарбиячилар, ўқитувчи ва домлалар меҳнатини  муносиб қадрлаш, уларнинг иш ҳақини, жамиятдаги нуфузини ошириш бўйича муҳим қадамлар қўйилмоқда. Соҳа ривожига бўлган ана шундай эътибор мактабларда ўқув-тарбия жараёнларини сифат жиҳатидан ўзгартиришга, ўқитувчилар таркибини яхшилашга хизмат қилмоқда. Биз таълим-тарбия масаласига комплекс ёндашган ҳолда, боғча таълими билан бирга олий таълим тизимини ҳам узвий ривожлантиришга алоҳида эътибор бермоқдамиз. Шу мақсадда мамлакатимизда мактабгача таълим ҳамда олий таълимни ривожлантириш дастурлари қабул қилинди ва шу асосда туб ислоҳотлар амалга оширилмоқда. Хусусан, кейинги икки йилда мамлакатимизда 35 та, жумладан, 13 та хорижий олий ўқув юрти ташкил этилди. Юздан ортиқ янги бакалавриат таълим йўналишлари ҳамда 94 та магистратура мутахассислиги бўйича кадрлар тайёрлаш йўлга қўйилди. Ана шундай чора-тадбирлар натижасида ёшларни олий таълим билан қамраб олиш даражаси уч йил бурунги 9 фоиздан 20 фоизга ошди. Биз яқин келажакда бу кўрсаткични 25 фоизга етказишни ўз олдимизга мақсад қилиб қўйганмиз. Яратилаётган имкониятлар туфайли Ўзбекистон ёшлари турли соҳаларда ўз билим ва салоҳиятини намоён этиб, Ватанимиз шуҳратини бутун дунёга тараннум этмоқда. Куни кеча Россиянинг Екатеринбург шаҳрида дунёнинг 80 га яқин мамлакатидан моҳир спортчилар иштирок этган бокс бўйича жаҳон чемпионатида миллий жамоамиз вакиллари юксак азму шижоат 
ва маҳорат намунасини кўрсатиб, биринчи ўринни эгаллагани барчамизни қувонтириб, ғурур ва ифтихор бағишлайди. Бундай улкан ютуқларни биз аввало сизлар каби фидойи устоз-мураббийларнинг фидокорона меҳнати натижаси сифатида...

Ўзбекистон Суриядан яна 170 киши ва Ироқдан 65 нафар бола қайтишини кутмоқда. Бу ҳақда Ўзбекистон ташқи ишлар вазири Абдулазиз Комилов 25 сентябрь куни БМТ Хавфсизлик кенгаши йиғилишида маълум қилди. «Ироқдан 65 нафар бола ва Суриядан 170 киши қайтиб келишини кутмоқдамиз. Шу маънода, бизга халқаро ташкилотлар ва Яқин Шарқдаги жараёнларда бевосита иштирок этаётган давлатлар ёрдами керак. Бу биринчи навбатда, Хавфсизлик кенгашининг бу ерда йиғилган доимий аъзолари томонидан кўрсатиладиган ёрдамга алоқадор. Биз бундай ҳамкорликка тайёрмиз. Умид қиламанки, бундай операцияларнинг муваффақиятли амалга оширилиши жиддий ижобий таъсир кўрсатиши мумкин, бунда янги гуруҳлар шундай зиддият ҳудудларига киришга интилмайди», — деди Ўзбекистон Ташқи ишлар вазири Абдулазиз Комилов. Абдулазиз Комилов май ойида Ўзбекистон 156 нафар фуқаросини Яқин Шарқдаги можароли ҳудуддан қайтариш бўйича «қийин ва хатарли» операция ўтказганини ҳам таъкидлаб ўтган. Манба: Daryo.uz   263