Хабар берганимиздек, 3 август куни юртимиздаги бир гуруҳ таниқли уламоларнинг Қашқадарё вилоятига ташрифлари бошланди.
Ташриф давомида Ўзбекистон мусулмонлари идораси бўлим бошлиғи Эрдон домла Эсонов Қарши шаҳридаги “Қиличбек Қўрғонча” жоме масжидига ташриф буюриб, пешин намозидан сўнг масжид жамоасига гўзал маъруза қилдилар, унда жумладан, юртимиздаги диний-маърифий ислоҳотлар натижалари айтиб ўтилди.
Таъсирли суҳбат ва савол-жавоблар масжид қавмига манзур бўлиб, бунинг учун жамоат Эрдон домлага миннатдорлик билдирди.
Тошкент шаҳридаги “Убай ибн Каъб” масжиди имом-хатиби Абдуҳаким қори Матқулов сафар давомида Қарши шаҳридаги марказий “Кўк гумбаз” жоме масжидига ташриф буюрди.
Дастлаб устоз Абдуҳаким қори пешин намозини жамоат билан адо этгандан сўнг намозхонлар билан дилдан суҳбат қурди.
Суҳбат асносида мўмин-мусулмонларга сўнгги йилларда юртимизда диний-маърифий соҳада амалга оширилаётган ислоҳотлар ҳақида ҳам гапириб, шукрнинг фазилатини баён этдилар.
Дилдан қилинган суҳбат савол-жавобларга уланиб, намозхонларда катта таассурот қолдирди.
Уламолар ташрифи давом этмоқда.
Қашқадарё вилояти вакиллиги матбуот хизмати
