Ражаб ойи ҳижрий –қамарий йил ҳисобининг 7 ойи ҳисобланади.
Ҳижрий-қамарий йил ҳисобида тўртта шаҳрул-ҳарам ой бўлиб, шулардан бири Ражаб ойидир. Ражаб ойи шаҳрул-ҳарам яъни Аллоҳ таоло инсонлар орасида уруш-низо, жанжалларни ҳаром қилган ойдир.
Қадимда Ражаб ойи келса, бу ойнинг ҳурматидан инсонлар ўзаро ихтилофларни, уруш-жанжалларни тўхтатганлар. Бу эса Ражаб ойи инсонларга хотиржамлик-тинчлик бахш этадиган ой эканлигига далолат қилади.
Халқимиз Ражаб ойини ҳурматлаб бу ойда туғилган болаларга Ражаб деб исмлар қўйишади.
Хўш Ражаб сўзи нима маънони англатади?
“Ражаб” сўзи арабча сўз бўлиб, у ўзбек тилида “қўрқмоқ”, “улуғламоқ” каби сўзларнинг маъноларини ифодалайди.
Маълумки, “ражаб” сўзи учта ундош ҳарфдан иборат. Ундаги Р-ҳарфи раҳм сўзидан, ж-ҳарфи журм, яъни айб-нуқсон, гуноҳ сўзидан, б-ҳарфи эса барий, яъни поклик сўзидан олинган. Бу ҳарфлар Аллоҳ таолонинг меҳрибонлик, айб-нуқсонларни кечиргувчи ва пок эканлик сифатларини ифодалаган сўзларнинг маъноларидан олингандир.
Мана халқимизнинг “Тўрт иноға” деб атайдиган ойларнинг тўртинчиси бўлган “Жумадул-охир” ойи ҳам охирлаб қолди. Яқинлашиб келаётган 13 Январь шанба кунидан Ражаб ойи бошланади.
Маълумки, одатда янги ой кўринса, уни барокатли бўлишини Аллоҳ таолодан сўраб дуо қиламиз. Пайғамбаримиз соллаллоҳу алайҳи васаллам қачон янги чиққан ойни кўрсалар шундай дуо қилардилар:
“اللَّهُمَّ أَهِلَّهُ عَلَيْنَا بِالْيُمْنِ وَالْإِيمَانِ وَالسَّلَامَةِ وَالْإِسْلَامِ وَالتَّوْفِيقِ لِمَا تُحِبُّ وَتَرْضَى رَبُّنَا وَرَبُّكَ اللَّهُ اللَّهُ أَكْبَر “
“Аллоҳу акбар, Аллоҳумма аҳиллаҳу алайна бил-юмни вал-иймани, вас-салаамати вал-тавфиқи, лимаа туҳиббу ва тарзо роббуна ва роббукаллоҳ ”.
“Аллоҳу Акбар(Аллоҳ буюк), Эй, Аллоҳим! Бу ойни бизларга барака ва имон, саломатлик ва Ислом Ва Ўзинг яхши кўрадиган, рози бўладиган нарсага муяссар этиш билан чиқар. Эй, ҳилол, менинг ҳам, сенинг ҳам Роббинг Аллоҳдир!” ( Имом Термизий ва Доримий ривояти).
Аллоҳ таоло кириб келаётган Ражаб ойини баракали ойлардан қилсин!
ЎМИнинг Қашқадарё вилоятдаги
вакиллик ходими Р. Акбаров
