Тошкент ислом институтида 2019/2020 ўқув йили ниҳоясига етмоқда. Битирувчи курс талабалари якуний аттестацияларни топширгач, битирув диплом ишлари ҳимоясини бошладилар. Пандемия сабаб март ойидан бошлаб талабалар таътилга чиқарилди ва дарслар масофадан олиб борилди. Юртимизда карантин чоралари юмшатилган бўлса-да, таълим муассасалари фаолияти бўйича чекловлар бекор қилингани йўқ. Шунинг учун ҳам диплом ҳимоялари онлайн тарзда ўтказилмоқда.
Шу йилнинг 1 июнь куни Тошкент исломи институтида кундузги таълим ва махсус сиртқи бўлим битирувчи курс талабаларининг диплом иши ҳимоялари бошланди. Ўзбекистон халқаро ислом академияси “Ислом фанлари” кафедраси доценти М.Муҳаммадсиддиқов раислигидаги илмий иш ҳимояларининг биринчи куни комиссия раиси ўринбосари ТИИ ректори У.Ғафуров кириш сўзи билан иштирок этиб, ўзига хос шаклда ўтказилаётган ҳимоя жараёнларида битирувчиларга омад тилади. Zoom видеоконференция иловаси орқали бўлиб ўтаётган илмий ишлар ҳимояси билан боғлиқ тартиб қоидаларни комиссия раиси М.Олимов батафсил тушунтириб берди.
Комиссия аъзолари ДИҚ Диний-маърифий таълим муассасалари билан ишлаш бўлими бошлиғи Б.Рустамов, ЎМИ Таълим ва илмий-тадқиқот бўлими мудири С.Шерхонов, Ўзбекистон халқаро ислом академияси Халқаро муносабатлар кафедраси профессори М.Муҳаммадсиддиқов, Халқаро ислом академияси Илмий тадқиқотлар ва иннавацион лойиҳалар маркази Исломшунослик бўлими мудири, фалсафа доктори А.Аллоқулов, Ўзбекистон халқаро ислом академияси таянч докторанти С.Масайитов, ТИИ Ўқув ва илмий ишлар бўйича проректор У.Ходжаев, ТИИ “Ақоид ва диний фанлар” кафедраси мудири С.Примов, ТИИ “Таҳфизул Қуръон” кафедраси мудири Ж.Неъматов, ТИИ “Ҳадис ва ислом тарихи фанлари” кафедраси мудири А.Тошпўлатов, Д.Носиров “Тиллар” кафедраси мудири, ТИИ “Ижтимоий фанлар” кафедраси мудири О.Тангиров, ТИИ “Ижтимоий фанлар ” кафедраси кабинет мудири М.Боймиров диплом иши ҳимояларини баҳолаб бормоқда.
Бу йил кундузги йўналишни 50 та ва сиртқи бўлимни 60 та талаба битирмоқда. Диплом иши ҳимоялари 11 июнь куни якунлаши режалаштирилган.
