26-iyun – Xalqaro giyohvandlikka qarshi kurash kuni (International Day Against Drug Abuse and Illicit Trafficking) butun dunyo bo’ylab giyohvand moddalarni suiiste’mol qilish va ularning noqonuniy savdosiga qarshi kurashishga bag’ishlangan xalqaro sana hisoblanadi.
Ushbu kun 1987-yil 7-dekabrda Birlashgan Millatlar Tashkiloti Bosh Assambleyasining 42/112-sonli rezolyutsiyasi bilan ta’sis etilgan. Qaror 1987-yil iyun oyida Avstriyaning Vena shahrida o’tkazilgan Giyohvand moddalarni suiiste’mol qilish va noqonuniy aylanmasiga bag’ishlangan xalqaro konferensiya tavsiyalari asosida qabul qilingan. Shundan so’ng, har yili 26-iyun sanasi ushbu xalqaro kun sifatida nishonlanib kelinmoqda.
Bu kunning asosiy maqsadi – giyohvandlikning inson salomatligi, oila va jamiyatga yetkazadigan zararini keng jamoatchilikka tushuntirish, yoshlar o’rtasida sog’lom turmush tarzini targ’ib qilish hamda davlatlar o’rtasida giyohvand moddalarning noqonuniy savdosiga qarshi hamkorlikni kuchaytirishdir. Shu munosabat bilan dunyoning ko’plab mamlakatlarida ma’rifiy tadbirlar, davra suhbatlari, seminarlar, sport musobaqalari va targ’ibot aksiyalari o’tkaziladi.
Bugungi kunda ushbu sana nafaqat giyohvandlikning oldini olish, balki giyohvandlikka qaram bo’lgan insonlarni davolash, reabilitatsiya qilish va ularni jamiyatga qayta moslashtirish masalalariga ham e’tibor qaratadigan muhim xalqaro sana sifatida e’tirof etiladi. Shu bois 26-iyun butun dunyo xalqlarini sog’lom va xavfsiz jamiyat barpo etish yo’lida birlashishga chorlaydi.
Giyohvandlik nafaqat inson salomatligiga, balki uning oilasi, jamiyati va kelajagiga ham jiddiy salbiy ta’sir ko’rsatadi. U jismoniy va ruhiy qaramlikni yuzaga keltirib, jinoyatchilikning ortishiga, oilalarning buzilishiga hamda insonning o’z orzu-maqsadlaridan uzoqlashishiga sabab bo’lishi mumkin.
Bugungi kunda yosh avlodni giyohvandlikning zararli oqibatlari haqida xabardor qilish, ularning bo’sh vaqtini mazmunli tashkil etish, sport, ilm-fan va san’atga bo’lgan qiziqishini oshirish eng muhim vazifalardan biridir. Zero, sog’lom fikr va sog’lom turmush tarzi – baxtli hayotning mustahkam poydevoridir.
Shu bois har birimiz giyohvandlikka qarshi kurashishda befarq bo’lmasligimiz, o’zimiz va atrofimizdagilarni ushbu illatdan asrashga hissa qo’shishimiz zarur. Chunki sog’lom avlod – yurtimizning eng katta boyligi va porloq kelajagining kafolatidir.
“Ijtimoiy fanlar” kafedrasi o‘qituvchisi Sh.Badiyev
