У зот соллаллоҳу алайҳи васаллам тўрт маротаба умра қилганликлари ривоят қилинади. Ибн Аббос розияллоҳу анҳунинг айтишларича “Росулуллоҳ тўрт маротаба умра қилдилар: Ҳудайбия умраси; иккинчи – ўтган галдан қолган зулқаъданинг қазо умраси; учинчи – Жиърона умраси; тўртинчи – ҳаж билан бирга (қилинган умра)”. Сунани Термизий 7/816.

Биринчи умра. Ҳижрий 6 йил. Зулқаъда ойи. Саҳобалар билан умра қилиш учун йўлга чиқадилар. Аммо маккаликлар уларни шаҳарга киритмади. Шаҳар яқинидаги Ҳудайбия минтақасида маккаликлар билан битим туздилар. Битимга кўра кейинги йил шу вақтда 3 кун давомида умра зиёратини амалга оширишлари мумкин бўлди. Эҳром билан умра ниятида келганлари, соч олдириб эҳромдан чиққанлари ва қурбонлик келтирганлари сабабали бу биринчи умра ҳисобланади.

Иккинчи умра. Ҳижрий 7 йил. Зулқаъда ойи. Ҳудайбиядаги ўтган йилги келишувга асосан адо этилган. Қазо умраси деб ҳам юритилади.

Учинчи умра. Ҳижрий 8 йил. Зулқаъда ойи. Пайғамбар соллаллоҳу алайҳи васаллам Ҳунайн урушидан қайтаётиб, Жиъронада ўлжаларни тақсим қилганлар. Жиърона Маккадан 11 км. масофада жойлашган. Пайғамбар солаллоҳу алайҳи васаллам шу жойдан тун қоронғусида Маккага бориб, шу кечанинг ўзида умра қилиб қайтганлар. Бу тарихда Жиърона умраси деб номланган.

Тўртинчи умра. Ҳижрий 10 йил Ҳаж асносида амалга оширган умралари ҳисобланади .

Пайғамбар соллаллоҳу алайҳи васалламнинг барча умра зиёратлари зулқаъда ойида бўлган. Фақат тўртинчи зиёрат  зулқаъда ойида бошланиб зулҳижжада якунланган.

Биринчи умранинг вақти танланган, аммо вақтнинг алоҳида фазилати эътиборидан танланмаган. Қолган зиёратлар вазият тақозосига кўра амалга ошган.

М.Насриев