Стадиондаги тест синовлари вақтлари ва контракт миқдори ўзгариши ё ўзгармаслиги тўғрисида ҳам маълумот берилди.
Олий ўқув юртлари бугунги кунда контракт миқдорини ўзгартирмайди. Камайтирмайдиям, кўпайтирмайдиям.
Бу ҳақда АОКАда бўлиб ўтаётган брифингда олий ва ўрта махсус таълим вазири Иномжон Мажидов маълум қилди, дея хабар бермоқда ЎзА мухбири.
Тест синовларига 2 соат вақт берилади
АОКАда бўлаётган брифингда ДТМ директори Мажид Каримов тест жараёнлари ҳақида айрим қўшимча маълумотларни маълум қилди, дея хабар қилмоқда ЎзА мухбири.
Жумладан, ўтган йиллари тест синовлари катта павильонларда 3 та сменада бўлган эди. Жорий йилда эса стадионларда 2 та сменада тест ўтказилади.
2 та фандан жами 60 та тест саволларига жавоб топиш учун абитуриентларга 2 соат вақт бериладиган бўлди.
Шунда 1-смена 08:00 да бошланса, 10:00 да тамом бўлади. 2-смена эса 17:00 да бошланиб, 19:00 да тугайди. Соат 10 дан 17 гача стадионда ҳеч ким бўлмайди.
Абитуриентлар махсус дезинфекцион йўлакдан ўтади, уларга тиббий ниқоб берилади ҳамда антисептик воситалар ишлатилади. Шунингдек, стадионда бўлаётганлигини инобатга олиб, абитуриентларга оқ бош кийим (кепка) тарқатилади.
Сиртқи ва кечки шакл имтиҳонлари ҳам стадионларда ўтказилади
ДТМ директори Мажид Каримов бу йилги тест синовлари очиқ майдонларда бўлиши ва кундузги, кечки, сиртқи шаклда, умуман ҳаммасида шу тарзда тест ўтказилишини маълум қилди, дея хабар бермоқда ЎзА мухбири.
Магистратура, академик лицейлар ва ижодий имтиҳонлар қачон ўтказилиши маълум қилинди
АОКАда бўлаётган брифингда олий ва ўрта махсус таълим вазири Иномжон Мажидов бу ҳақда маълумот берди:
– Барча йўналишлар бўйича қабул жараёнлари, жумладан магистратура, академик лицейлар ва ижодий имтиҳонлар ҳам тест синовлари бўлиб ўтаётган бир вақтда, айни шу даврда ўтказилади.
Маълумот учун: тест синовлари 2 сентябрдан бошланади ва 14 кун давом этади.
Шунингдек, бу йилги тест синовлари кузатувчи ва назоратчиларининг ҳар бирига боди-камера ўрнатиш таклиф қилинди.
