Мустақил фикрлайдиган, замонавий илм-фан ва касб-ҳунарларни пухта эгаллаган, ўз юрти, ўз халқига фидойи, аждодлари бошлаган ҳайрли ишларни давом эттиришга қодир бўлган ҳар томонлама комолотга етган авлодни енгиб бўлмайди.
Доим ўрганиш, изланиш, янгиликка интилиб яшаш, теран фикрлаш, юксак натижаларни қўлга киритиш учун китоб билан ошно бўлиш зарур. Бугун диний таълим муассасаларда ёшлар таълим-тарбияси, маънавий баркамоллигига эътиборнинг кучайтирилиши халқимизнинг ёшлар келажагига юксак ишонч билдирилаётганидан далолатдир.
Шуни инобатга олиб талабаларнинг бўш вақтини мазмунли ташкил этиш мақсадида Ўзбекистон мусулмонлари идораси тасарруфидаги Имом Бухорий номидаги Тошкент ислом институтида жорий қилинган “Китобхонлик куни” муносабати билан институтда ҳар ойда китоб кўргазма савдоси ташкил этиш йўлга қўйилган.
Мазкур анъанага мувофиқ институт устоз ва талабаларининг диний-маърифий, маънавий ва бадиий савияларини янада юксалтириш мақсадида Тошкент ислом институти асосий биносида “Ҳилол-нашр” нашриёти ҳамкорлигида ташкил этилган китоб кўргазма савдоси бўлиб ўтди.
Кўргазмада институтнинг устоз ва талабалари фаол иштирок этди. Мазкур кўргазмада “Ҳилол нашр” нашриёти ходимлари кўргазма иштирокчиларига 131 номдаги 565 дона бадиий, илмий, тарих, диний-маърифий адабиётлар, араб, инглиз, рус ва ўзбек тили луғат китоблари, шеърий тўплам китобларни тақдим қилдилар.
Ўзбекистон мусулмонлари идораси раиси, муфтий Нуриддин Холиқназаров Тошкент ислом институтига ташрифи чоғида мазкур кўргазмада қатнашиб, китоблар билан танишдилар.
АРМ мудири Усмонхон Баҳодирхонов
