Ушбу мақолада интернет оламида машҳур бўлган суданлик бир йигитнинг ўзи билан содир бўлган ҳалоллик тўғрисидаги иккита воқеани келтирамиз.
Биринчиси:
Ирландияда тиббиётдан имтихонларим бор эди. Имтиҳоннинг тўлови 309 фунт эди. Менда майда пул йўқ эди. Шу сабаб 310 фунт бердим. Муҳими имтихонни топширдим. Имтиҳонлар тугагач Суданга қайтдим. Сал ўтиб Ирландиядан хат келди. Унда шундай ёзилган эди:
“Сиз имтиҳон тўловини тўлашда хато қилибсиз. Тўлов 309 фунт эди. Сиз 310 фунт тўлабсиз. Сизга бир фунтлик чек юбордик. Биз ўз ҳақимиздан ортиғини олмаймиз”.
Қизиғи, мактуб билан марканинг нархи бир фунтдан қимматроқ эди.
Иккинчиси:
Мен факультетга қатнар эдим. Уйим билан факультет орасида бир аёл у-бу нарса сотар эди. Мен ундан 18 пенсга какао сотиб олар эдим.
Бир куни у ердан ўтаётсам дўконнинг бошқа токчасида айнан ўшандай какаонинг нархи 20 пенс ёзилган ҳолда турибди.
Мен таажжубланиб сўрадим:
– Нега биринчи токчада какаонинг нархи 18 пенс, иккинчи токчада эса 20 пенс?
У деди:
– Яқинда бизга какаони экспорт қиладиган давлат Нигерияда мушкулотлар юзага келиб нархлар кўтарилибди. Бу токчадаги кейин келган юкдан. Шунинг учун қиммат. Мана буниси эса олдингидан. Шунинг учун у арзон.
Мен:
– Ундай бўлса кишилар олдин арзонини олишади. У тугаса кейин қимматини олишади. Токи арзони тугамас экан қимматни ҳеч ким олмайди-ку, дедим.
У:
– Ҳа, буни биламан, деди.
Мен:
– Шундай экан, уларни аралаштириб арзонларини ҳам 20 пенсдан сотсангиз бўлмайдими? Буни хеч ким билмайди-ку! – дедим.
Шунда у қулоғимга:
– Сен қароқчимисан? – деди.
Унинг жавобини эшитиб ўзимга ўзим дедим: “Наҳотки, мен қароқчиман”
Хулоса ўзингиздан!
